მსოფლიო რაგბმა საქართველოს რაგბის კავშირის ყოფილი პრეზიდენტი გია ნიჟარაძე რაგბის განვითარებაში შეტანილი წვლილისთვის სპეციალური პრიზით, ვერნონ პიუს პრემიით დააჯილდოვა.
გია ნიჟარაძე 2004-2007 წლებში რაგბის კავშირის გამგეობის წევრი, 2008-2016 წლებში კი რაგბის კავშირის პრეზიდენტი იყო. 2012 წლიდან ის ასევე არის რაგბი ევროპის ვიცე-პრეზიდენტი, 2016 წლიდან კი საქართველოს წარმომადგენელი მსოფლიო რაგბში.
ვერნონ პიუს ჯილდო 2001 წელს დაწესდა. ის გადაეცემა პიროვნებას, კავშირს ან ჯგუფს, ვისაც საკუთარ ქვეყანაში და მის ფარგლებს გარეთ რაგბის განვითარებაში დიდი წვლილი მიუძღვის.
„საქართველოს რაგბის კავშირის ყოფილი პრეზიდენტი დაუღალავად შრომობდა არა მხოლოდ ქართული, არამედ ევროპული რაგბის განვითარებისთვის. სწორედ მისმა შრომამ ჩაუყარა საფუძველი ქართული რაგბის წარმატებებს. გიორგი ნიჟარაძე პირველი ქართველია, რომელიც მსოფლიო რაგბის საბჭოში მოხვდა“ – წერს მსოფლიო რაგბი.
