ქართულმა ჯარმა საფრანგეთში გამართული შეიარაღებული ძალების მსოფლიო თასის დასკვნით მატჩში ავსტრალიას 55-16 სძლია და ტურნირი მე-5 ადგილზე დაასრულა.
პირველ ტაიმში ხშირად ვჯარიმდებოდით, რითიც მეტოქემ ისარგებლა, ორი ჯარიმის შემდეგ ლელო გაიტანა, გარდასახა და 15 წუთის შემდეგ 13-0 დაწინაურდა. რამაზ ხარაზიშვილმა და ვანო ბერიკაშვილმა მალევე შეძლეს საპასუხო ლელოების დადება, გარდასახვებიც ზუსტი იყო და ლევან ობოლაძის შეგირდები 1 ქულით დაწინაურდნენ. 38-ე წუთზე ავტრალიამ ჯარიმით დაიბრუნა უპირატესობა, თუმცა გაწითლებულ დროზე მოლის შემდეგ ხაზზე გავიდა ბურთი, თაიგ სქურმა ხაზი გაჭრა და პირველი ნახევარი 19-16 მოვიგეთ.
მეორე ტაიმში საქართველომ ტურნირზე საუკეთესო თამაში აჩვენა, მეტოქეს ქულა არ ააღებინა, თავად კი 36 გაიტანა (5 ლელო). ამრიგად, საქართველომ მესამედ ითამაშა შეიარაღებული ძალების მსოფლიო თასზე და წელს საუკეთესო შედეგი აჩვენა – 4 თამაში დიდი სხვაობით მოიგო, ერთში კი დიდ ბრიტანეთთან მხოლოდ 3 ქულა დათმო და საბოლოოდ მე-5 ადგილს დასჯერდა.
შეიარაღებული ძალების მსოფლიო თასი
საფრანგეთი. 9 სექტემბერი. V ადგილისთვის
საქართველო – ავსტრალია 55:16 (19:16)
საქართველო
ხაზი: 15. საბა ილურიძე, 14. ბექა მაჭარაშვილი, 13. საბა დათიაშვილი, 12. თაიგ სქური, 11. რამაზ ხარაზიშვილი (კაპ.), 10. დავით მოძღვრიშვილი, 9. გიორგი მარგალიტაძე;
შერკინება: 1. გოგა ქადარია, 2. გელა მახარაშვილი, 3. გიორგი ჩხარტიშვილი, 4. გიორგი შუკაკიძე, 5. ვანო ბერიკაშვილი, 6. გიორგი თხილაიშვილი, 7. თენგო გიგოლაშვილი, 8. თორნიკე ზოიძე.
მარქაფა: 16. დიმიტრი ცაბაძე, 17. ნიკა სვიმონიშვილი, 18. გიორგი ქიმუცაძე, 19. გიგა კაციტაძე, 20. ლევან რატიანი, 21. სანდრო ნახუცრიშვილი, 22. ზურაბ ფირცხალაიშვილი, 23. გოგა გელაშვილი.
