ბორჯღალოსანთა ცენტრი გიორგი კვესელაძე „შემოდგომის ერთა თასის“ მესამე ტურის საუკეთესო მოთამაშე გახდა.
23 წლის მორაგბემ, ირლანდიას პირველ ტაიმში შესანიშნავი, ინდივიდუალური ლელო გაუტანა. მან ხაზი ცენტრში გაჭრა და ლელომდე 50 მეტრი ირბინა. გარდა ამისა, ის კარგად ირჯებოდა დაცვაში და 17 ბოჭვა შეასრულა, მათ შორის მეტოქის 8 ნომერ სი’ჯეი სტანდერზე, რომელსაც უკან დაახევინა და დაცვის ტექნიკის შესანიშნავი უნარები გამოავლინა.
შედეგმაც არ დააყოვნა და კვესელაძე როგორც ტურნირის ოფიციალურ, ასევე სხვადასხვა გამოცემების ტურის სიმბოლურ გუნდში მოხვდა.
მისი თამაშით მოხიბლულმა ირლანდიელთა ყოფილმა კაპიტანმა, ირლანდიური და მსოფლიო რაგბის ლეგენდა ბრაიან ო’დრისკოლმა საკუთარ „თვითერზე“ დაწერა:
If I was a European club looking for a centre next year (contract dependent) I’d be having a serious look at Giorgi Kveseladze (13) for Georgia on Saturday. Besides the excellent try he really gets the defensive part of his game too. Abrasive & hard working. Could have been MOTM
— Brian O'Driscoll (@BrianODriscoll) November 30, 2020
„მე რომ ევროპული კლუბი ვიყო და მომავალი სეზონისთვის ცენტრს ვეძებდე, სერიოზულად დავაკვირდებოდი საქართველოს ნაკრების ცენტრ გიორგი კვესელაძეს. გარდა ბრწყინვალე ლელოსი, მისი თამაში დაცვაშიც კარგია. ხისტი და მშრომელია. მისი მატჩის საუკეთესო მოთამაშედ დასახელებაც შეიძლებოდა“.
ირლანდიის ნაკრების კიდევ ერთმა ვეტერანმა, RTE Sport-ის ანალიტიკოსმა ბერნარდ ჯეკმენმა კი დაწერა – „კვირის საუკეთსო ლელო გიორგი კვესელაძეს ეკუთვნის“.
International try of the weekend has to go to @GeorgianRugby centre Giorgi Kveseladze. Love the Georgian commentators excitement👏👏#IREvGEO https://t.co/JNPs8UKP5R
— Bernard Jackman (@bernardjackman) November 29, 2020
კვესელაძემ ტურის საუკეთესო მოთამაშის ტიტულისთვის ბრძოლაში, რომელსაც გულშემატკივრები ირჩევენ, ინგლისელ სემ ანდერჰილს, უელსელ ჯონი უილიამსს და ფრანგ ბრის დულინს აჯობა. ის შეუერთდა შოტლანდიელ დუან ფან’დერ’მერვეს (პირველი რაუნდის საუკეთესო) და ინგლისელ ჯონი მეის (მეორე რაუნდის საუკეთესო). ქართველმა ხმების 88,7% მიიღო.
