საქართველოს რაგბის კავშირი და ქართული სარაგბო თემი მწუხარებას გამოთქვამს ახალგაზრდა ქართველი მორაგბის, ბექა ბურდიაშვილის ტრაგიკულად დაღუპვის გამო.
27 წლის მორაგბე საფრანგეთში 2013 წლიდან თამაშობდა. ის ერთი წელი პრო დე2-ს ‘კარკასონის’ ღირსებას იცავდა, რის შემდეგაც ფედერალ 1-ის ‘გროლეში’ გადავიდა და იქ 3 წელი გაატარა. 2017-2019 წლებში ბურდიაშვილი ასევე ფედერალ 1-ის ‘ლა სენის’ მოთამაშე იყო, მიმდინარე სეზონის წინ კი ‘გროლეს’ დაუბრუნდა.
ტრაგიკული შემთხვევა გუშინ დილით, საფრანგეთის დროით 09:30 საათზე მოხდა. ბექა ‘გროლესა’ და ‘ლავორის’ შეხვედრაზე მიდიოდა, რა დროსაც საჭე ვერ დაიმორჩილა და გზის სავალი ნაწილიდან გადავიდა…
რაგბის კავშირი და ქართული სარაგბო თემი უსამძიმრებს ბექა ბურდიაშვილის ოჯახს.
