შაბათს გამთენიისას, ქარიან მონტევიდეოში, შავი ლომი სუდამერიკა XV-ს ერაგბა. ტურნეს მე-4 მეტოქე სამხრეთ ამერიკული ნაკრები იყო (ბრიტანელი ლომების მსგავსი), რომლის ისტორიაც 1980 წლიდან იწყება და უწინ ბოკესათვისაც კი უმასპინძლია. მათი ახლანდელი ფორმებიც, ძველ ყაიდაზე იყო გაწყობილი, ოღონდ ეგაა, ჩვენი საყვარელი და მეტად რაგბული საყელო მაინც აკლდა.
ჩვენებმაც, ტრავმებისა და სხვა მიზეზთა გამო გუნდი გვარიანად გადაახალისეს – დამწყები 15-დან 9 კაცი შევცვალეთ. შავ ლომს პირველად კაპიტნობდა მიხეილ ნარიაშვილი, 15-ეულში დაბრუნდა ნაკრების და ფრენჩაიზის საუკეთესო მელელოვე აკა ტაბუცაძე, ხვამლიდან ახლად გამოძახებული საბა კურტანიძის დებიუტი კი დასკვნით 7 წუთში შედგა.
თამაში მოსალოდნელზე უფრო ლაღი გამოდგა, გუნდები ჯარიმებს კიდეებზე ურტყამდნენ, მაგრამ მონტევიდეოს ქარმა ოვალი რამდენჯერმე ლელოს კიდესაც გადააცილებინა. ხელოვნურ-საფარიანი მოედნის დარად, ვერც მსაჯობა იყო ხეირიანი, ვიდეო-რეფიც პირველსავე გადამოწმებაზე ატყობინებდა მსაჯს, მადლიანმა ESPN-მა კი ტელე-ტაბლო მთელი თამაში არ გვაღირსა.
პირველი ტაიმი პირ-ქარში ვითამაშეთ, მეტოქე ჯახში დავჯაბნეთ და ლელომაც არ დაახანა; ჯერ ლომიძე მიეძალა ცენტრში, შემდეგ მ.ბაბუნაშვილმა და ნარიაშვილმა აუბეს მხარი, ხოლო შეჯგუფებული მეტოქე ჩვენმა მგეზავმა გრძელი პასით მოჭრა და ტაბუცაძეს პირველი ლელო გაატანინა. (5:0)
ნახევარი საათი ჯახსა და ჭიდილში გავატარეთ, საწყის 2 შერკინებაში პირნათლად დავაჯარიმეთ, მაგრამ მსაჯი უმალ სტვენდა ჩვენ პატარა დარღვევებზეც კი, ისე რომ ორჯერ კარგად აგორებული მოლით გატანილი ლელოები, ტელე-რეფის დახმარებით, ორივე ბლოკად გაგვისაღა, აქაოდა ახალი მოლი ჩამოყალიბდა, ხოლო ბურთიანი კაცის წინ მდგომები მეტოქეს უღობავდნენ გზასო.
ამის შემდეგ, დაცვაში მოგვიწია გამაგრება. 5 წუთი ჩვენს 5 მეტრიანს ვიცავდით, მაგრამ ცოტა რომ დავიღალეთ, მაშინ გაყოჩაღდა მეტოქე და ტაიმის ბოლოს ჯერ რაქებიდან აიღე და მიეძალეთი დაგვიდეს ლელო, შემდეგ კი მოლით დაგვაფინიშეს. (5:14) ოღონდ ეგაა, ტელე-რეფმა ამ შუალედშიც 2 ლელო გააუქმა, და ისიც პირველივე გადამოწმებაზე – ჯერ მეტოქემ ჩინებული ბურთაობით დაგვიდო ლელო, ჩვენებმაც, აქაოდა არავისზე ნაკლებად არ ვიცით პასაობაო, შემდეგსავე შეტევაზე ხაზის დახმარებით მორკინალებმა გაილაღეს, მაგრამ მსაჯმა მოდებაძის პასი ოდნავ წინ იყოო.
მეორე ტაიმში მაისაშვილმა ლიდერები შემოიყვანა, მგეზავად ლუკა მატკავა, ხოლო ცენტრში, კაპიტანი მერაბ შარიქაძე გაამწესა. თამაშსაც ეგრევე დაეტყო ცვლილებები – მატკავამ ჰაერში მოხსნილი ბურთი, მოდებაძეს გადააწოდა, მოდებაძემ ფრთისკენ შეტევით მარგალიტაძე ჩართო, რომელმაც ოვალი ოსტატურად დაუგორა ტაბუცაძეს, ხოლო ტაბუცაძემ ბურთი მუხლით აიგდო და ლელოში შეინავარდა, (12:14) რითაც შავი ლომის ბომბარდირობა დაიბრუნა: 19 თამაშში 16 ლელო.
ხაზმა კიდევ უფრო გაილაღა, როდესაც ხაზზე გათამაშებული ბურთი შარიქაძემ ტაბუცაძეს შეუბრუნა, მაგრამ ვიდეომ აქაც პასი წინ იყოო. შემდეგ ბედი მოლში ვცადეთ, საიდანაც მოულოდნელად მამამთავრიშვილი მოეხსნა და ეულად ლელოში აღმოჩნდა. (17:14)
55 წუთისთვის ხაზმა ისევ იყოჩაღა, ერთი ფლანგიდან მეორეზე გათამაშებულმა კომბინაციამ შედეგი იოლად გამოიღო, მაგრამ საქმეში ისევ ტელე-რეფი ჩაერთო და ამ თამაშში ოდენ მე-5 (!) ლელო გაგვიუქმა.
ოდნავ გაბრაზებულნი მსაჯთან საუბარს შევყევით, მეტოქემაც იგრძნო ჩვენი უკმაყოფილება და თავის თამაშში მარტივად აგვიყოლია, ფეხით დარტყმებს მოუკლო, ჯარიმებს სწრაფად ათამაშებდა და ყველანაირად ცდილობდა რაქში ბინძური თამაშით წყობიდან გამოვეყვანეთ. 70 წუთზე სწარაფად გათამაშებული ჯარიმა ვერ დავიცავით და მათმა კაპიტანმა მეტოქე დააწინაურა (17:21).
ჩვენების პასუხმაც არ დააყოვნა, მოგერიებულის დაფარების შემდეგ ბურთი აქეთ-იქით ჩავათამაშეთ, მეტობა შევქმენით და თაფლაძემ ორი მბოჭავი მარტივად გააბითურა. (24:21)
არც მეტოქე გატყდა, სწრაფი თამაშის შემდეგ დაგვაჯარიმეს, ბურთი კიდეზე დაარტყეს და იქიდან აგორებული მოლით მეორედ დაგვალელოვა ჩილეელმა აგუსტინ ბომემ, რომელიც 2 კვირის წინ სელკნამის სახელით გვერაგბა, სახრეთელმა 10 ნომერმა კი 4-დან 4 გარდასახვა გაგვიტანა (24:28). ბოლო შეტევებზე ჩვენი შანსი ვერ გამოვიყენეთ, მსაჯმაც ბევრი სცოდა, მეტოქემ დრო გაიყვანა და გადაცილებულზე კიდეზე გადაიტანა.
ამრიგად, შავი ლომი სამხრეთ ამერიკულ ტურნეზე ბოლო და ყველაზე საინტერესო თამაშის მოლოდინშია. ჩვენი შემდეგი მეტოქე, მასპინძელი, ურუგვაული ფრენჩაიზი პენიაროლია, რომელიც შავი ლომის დარად, ან უფრო მეტადაც, ურუგვაის ნაკრების ბირთვია. თამაში შემდეგ შაბათს, 6 მაისს 22.00 საათზე დაიწყება, რითაც შავი ლომის ტურნე სამხრეთში დასრულდება, ჩვენი ბიჭები სამშობლოს დაუბრუნდებიან, ცოტას დაისვენებენ და შემდეგ მსოფლიო თასისთვის მომზადებას შეუდგებიან.
სამხრეთ ამერიკული ტურნე
29 აპრილი. მონტევიდეო. ჩარუა (ურუგვაი)
შავი ლომი (საქართველო) – სუდამერიკა XV 24:28 (5:14)
შავი ლომი
15 მირიან მოდებაძე 14 აკაკი ტაბუცაძე 13 დემურ თაფლაძე 12 ლაშა ლომიძე 11 ოთარ ლაშხი 10 გიორგი ბაბუნაშვილი 9 გიორგი მარგალიტაძე;
1 მიხეილ ნარიაშვილი © 2 თენგიზ ზამთარაძე 3 გიორგი ჩხარტიშვილი 4 მიხეილ ბაბუნაშვილი 5 გიგა ჯულუხაძე 6 მიხეილ გაჩეჩილაძე 7 სანდრო მამამთავრიშვილი 8 ლუკა ივანიშვილი;
16 შალვა მამუკაშვილი 17 გოგა ქადარია 18 ნიკა ხატიაშვილი 19 დავით აბდუშელიშვილი 20 საბა კურტანიძე 21 თენგიზ პერანიძე 22 ლუკა მატკავა 23 მერაბ შარიქაძე 24 თორნიკე კახოიძე 25 ნოდარ ჭეიშვილი;
4ლ: ტაბუცაძე [1 2], მამამთავრიშვილი, თაფლაძე;
2გ: მატკავა;
