საფრანგეთის ტოპ 14-ის მეორე ტურის ერთ შეხვედრაში ორი ქართული ლელო გავიდა. ანგარიში გელა აფრასიძემ გახსნა, ბოლო შედეგიანი შეტევა კი ვანო კარკაძის ანგარიშზეა.
‘მონპელიე’ ‘ბრივს’ მასპინძლობდა და ანგარიში მე-4 წუთზე გაიხსნა. მოლს კვაჭი მოწყდა, აფრასიძეს ოფლოუდი ამოუგდო, ქართველმა 9 ნომერმა ფინტით ერთი მცველი ჩამოიშორა და ლელო ძელებს უკან გაიტანა. გელასთვის ეს საფრანგეთში გატანილი მესამე ლელოა. ის სასტარტო შემადგენლობაში იყო და 54-ე წუთზე შეცვალეს.
ერთბაშად 5 ჩვენებური იყო ‘ბრივის’ მარქაფაში. ვასილ ლობჟანიძე შეცვლაზე 36-ე წუთზე შევიდა, კარკაძე 45-ეზე, ლუკა ჯაფარიძე 48-ეზე, ხოლო თედო აბჟანდაძე და ოთარ გიორგაძე 49-ეზე. 68-ე წუთზე ვანომ სტუმართა მოლი ლელოთი დააგვირგვინა და საბოლოო შედეგი დააფიქსირა – 39:17 ‘მონპელიეს’ სასარგებლოდ. კარკაძესთვის ეს პირველი გატანილი ლელოა ტოპ 14-ში.
‘კასტრი’ ‘კლერმონს’ ეწვია და 77-ე წუთზე გატანილი ლელო-გარდასახვით 34:30 იმარჯვა. სტუმართა შორის 61-ე წუთიდან ითამაშა ლევან ჩილაჩავამ.
26-ე წუთიდან კაცნაკლულად მოთამაშე ‘პომ’, შინ 21:17 სძლია ‘ლიონს’. მასპინძელთა რიგებში თამაშში 57-ე წუთიდან ჩაერთო ბექა გორგაძე, ხოლო სტუმართა რიგებში ბექა საღინაძე შეცვლაზე 47-ე წუთზე შევიდა.
ორი ქართველი ბურჯი გავიდა მოედანზე ‘პერპინიანისა’ და ‘ბიარიცის’ შეხვედრაში. მასპინძელმა ‘პერპინიანმა’ 33:20 მოიგო და მათ რიგებში 51-ე წუთზე გამოჩნდა გიორგი თეთრაშვილი. სტუმართა ძირითად შემადგენლობაში იყო და 61-ე წუთზე შეცვალეს უშანგი ჭეიშვილი.
‘ბორდომ’ ‘სტად ფრანსე’ მიიღო, ერთის წილ ოთხი ლელო გაუტანა და ბონუსით, 37:10 დაამარცხა. მასპინძელთა რიგებში პირველი ტაიმი ითამაშა ლექსო ყაულაშვილმა. სტუმართა ძირითადში იყო და 46-ე წუთზე შეცვალეს ვასილ კაკოვინი, ხოლო გიორგი მელიქიძე შეცვლაზე შესვენების შემდეგ შევიდა. მელიქიძისთვის ეს პირველი მატჩი იყო მიმდინარე სეზონში.
‘რასინგ 92’-მა ‘ლა როშელი’ მიიღო და 23:10 დაამარცხა. პარიზელთა შორის მიმდინარე სეზონში პირველი თამაში ჩაატარა გურამ გოგიჩაშვილმა. ის შეცვლაზე 45-ე წუთზე შევიდა. ‘ლა როშელში’ და ზოგადად ტოპ 14-ში გურამ პაპიძის დებიუტი შედგა. ქართველი ბურჯი სასტარტო შემადგენლობაში იყო, შესვენებისას შეცვალეს, თუმცა 71-ე წუთზე მოედანზე მოუწია დაბრუნება.
ბექა გიგაშვილის ‘ტულონი’ ‘ტულუზს’ ეწვია და 10:41 დამარცხდა. ქართველი ბურჯი სტუმართა ძირითადში იყო და 62-ე წუთზე შეცვალეს.
ფოტო: rugbyrama
