საბა აბულაშვილი, შოთა ცაგარეიშვილთან და გიგა მშვენიერაძესთან ერთად, რაგბი ევროპის „ალაფის“ ცენტრალურ მატჩს განსჯის.
13 ნოემბერს პოლონეთი გერმანიას გდინიაში მასპინძლობს. ორივე გუნდს თითო შეხვედრა აქვს ჩატარებული. პოლონელებმა ლვოვში უკრაინა 27:24 დაამარცხა, ხოლო გერმანიამ შიაულიაიში მასპინძელ ლიტვას 46:16 მოუგო და ბონუსიც აიღო.
აღსანიშნავია, რომ აბულაშვილს პანდემიის გამო საერთაშორისო ასპარეზზე თითქმის ორწლიანი იძულებითი შესვენება მოუწია. 30 ოქტომბერს მან რაგბი ევროპის სუპერ თასზე, სოსო ჯაფარიძესა და პაპუნა ჭიქაბერიძესთან ერთად ბელგიაში, ‘დევილსისა’ და პორტუგალიური ‘ლუზიტანოსის’ შეხვედრა იმსაჯა და კარგი შეფასება მიიღო:
„სასიამოვნო, გახსნილი თამაში იყო. ამ ტურნირს ბევრი სარგებლის მოტანა შეუძლია, რადგან რაგბი ევროპაში შემავალი ქვეყნების კლუბები, აქამდე მხოლოდ შიდა ჩემპიონატებში „იხარშებოდნენ“, ახლა კი მეტი შესაძლებლობა აქვთ. გარდა კლუბებისა, ეს ასევე ახალი შესაძლებლობაა მსაჯების განვითარებისთვის. ვფიქრობ, ‘ლუზიტანოსი’ დასავლეთ კონფერენციის უდავო ლიდერია, თუმცა ჩემი აზრით, აღმოსავლეთ კონფერენციაში უფრო ძლიერმა შემადგენლობამ მოიყარა თავი“ – ამბობს აბულაშვილი და განაგრძობს:
„პანდემიის გამო თითქმის ორი წელი გაჩერებული ვიყავით და ჩემთვის მნიშვნელოვანია ეს დანიშვნები. ბელგიის მატჩის შემდეგ კარგი შეფასება მივიღეთ ახლაც იგივეს ვგეგმავ. გერმანია „ალაფის“ მოგების მთავარი პრეტენდენტია, პოლონეთი კი ფაქტობრივად მათი ერთადერთი კონკურენტი. მოხარული ვარ, რომ ასეთი მნიშვნელობის თამაში მანდეს და ვეცდები გუნდთან ერთად მოლოდინი გავამართლო“.
