დიდი 10-ის 2020 წლის პირველ მატჩში, ბოლნისის ‘ყოჩებმა’ თბილისის ‘იუნკერები’ 22:10 დაამარცხა და ბოლო ადგილს თავი დააღწია.
მე-12 ტური „ავჭალაზე“ განახლდა და სტუმრებმა თავიდანვე მოიპოვეს უპირატესობა. ‘ყოჩების’ შერკინებამ მე-6 წუთზე ჯარიმა გამოიმუშავა და თემურ სოხაძემ 40 მეტრიდან ანგარიში გახსნა. მას უფრო ხელსაყრელი პოზიციიდან მეორე დარტყმა გაუცუდდა, თუმცა მე-11 წუთზე ანგარიში კიდევ უფრო გაიზარდა. ირაკლი გეგენავამ ფეხით გადაკიდებული ბურთი საკუთარ ნახევარზე, 10-მეტრიან წყვეტილთან დაიჭირა, მოკლე მონაკვეთში 5 მბოჭავს დაუსხლტა, გზად მეექვსეც ჩამოიცილა და 60-მეტრიანი რეიდი ულამაზესი ლელოთი დაასრულა, ხოლო სოხაძემ გარდასახვით ანგარიში 10:0 გახადა.
რამაზ ხარაზიშვილმა ერთი ჯარიმა გაქვითა, რაზეც ‘ყოჩებმა’ 22-ე წუთზე მეორე ლამაზი ლელოთი უპასუხა. დავით ხიდეშელმა ხაზი გაჭრა და დიდი მანძილი მოიგო, ბოლო მცველი აიყვანა და მოკლე ფრთაზე ოფლოუდი გიორგი ტყეშელიაძეს ამოუგდო, რომლის ლელო სოხაძემ გარდასახა. შესვენებამდე, 32-ე და 33-ე წუთებზე, ‘იუნკერებმა’ სინბინით მამუკა ერისთავი და ნიკოლოზ მერკვილიშვილი დაკარგა, თუმცა 13-მა მასპინძელმა ლელოს დაცვა მოახერხეს, სოხაძეს ერთი ჯარიმა გაუცუდდა და ტაიმი 17:3 დასრულდა.
მეორე ტაიმში 49-ე და 53-ე წუთებზე, სინბინით ორი მოთამაშე უკვე ‘ყოჩებმა’ დაკარგა – გიორგი ხოსიტაშვილი და მიხეილ არჩუაშვილი, მაგრამ მათაც შეძლეს 13 კაცით თავის დაცვა და კონტრშეტევაზე ლელოც გაიტანეს: გურამ გოგიძემ ხაზი გაჭრა და მისი ოფლოუდი ლელოთი ლევან გოგოლაშვილმა დაასრულა – 22:3. ‘იუნკერებმა’ საფინალო სასტვენამდე რამდენიმე წუთით ადრე ნიკა მარჯანიშვილის ლელოთი და დიტო კიკნაძის გარდასახვით სხვაობა შეამცირა, მაგრამ მეტის მიღწევა ვეღარ მოახერხა და ბონუსიც ვერ აიღო.
‘ყოჩები’ ამ მოგებით ბოლოდან მე-7 ადგილამდე (17 ქულა) აღზევდნენ, ‘იუნკერებს’ კი 15 ქულა დარჩა და ბოლო ადგილზეა.
ფოტო: ანი რეხვიაშვილი
